20 ویں سالگرہ پر گوگل میں کئی نئے فیچر متعارف

شیئر کریں

ورلڈ وائیڈ ویب (www) پر گوگل سرچ کی آمد کو 20 سال مکمل ہوگئے ہیں اور اس موقع پر کمپنی نے اپنی اس اہم ترین پراڈکٹ کو متعدد نئے فیچرز کے ذریعے اپ ڈیٹ کیا ہے۔ درحقیقت یہ فیچرز آرٹی فیشل ٹیکنالوجی پر مبنی ہے اور اب گوگل سرچ صارف کے سرچ کے تجربے کا اندازہ خودکار طور پر لگانے کی کوشش کرے گی۔

اسی طرح گوگل نے اپنی توجہ موبائل پر مرکوز کی ہے اور ایسا لگتا ہے کہ تمام نئے فیچرز ڈیسک ٹاپ پر نہیں بلکہ اسمارٹ فونز پر کام کریں گے۔ اس حوالے سے پہلا فیچر ایکٹیویٹی کارڈ ہے جس میں سرچ رزلٹس کے اوپر ایک پتلی سی پٹی ابھر آئے گی جس پر کلک کرنے پر ایک کارڈ متعلقہ سرچز کو شو کرے گا جبکہ اسی موضوع پر صارف کی پرانی سرچز کو بھی دکھائے گا۔

 ایک نیا فیچر کلیکشنز کا ہے جس میں صارفین مخصوص موضوعات پر اپنی سرچز کو محفوظ اور آرگنائز کرسکیں گے، بالکل پنٹیریسٹ سرچ کی طرح۔ گوگل فیڈ نامی فیچر کو بھی اپ ڈیٹ کیا گیا، اس فیچر میں صارف کی دلچسپی کے موضوعات کو کارڈز کی شکل میں دکھایا جاتا ہے، اب اسے ڈسکور کا نام دیا گیا ہے اور صارف کو مواد کے حوالے سے زیادہ کنٹرول دیا جارہا ہے۔

اگر صارف کئی زبانوں سے واقف ہوگا تو یہ کارڈ کئی زبانوں پر سامنے آئیں گے اور یہ ڈسکور فیڈ تمام موبائل صارفین کے گوگل ہوم پیج پر متعارف کرائے جائے گی۔ اگر تو آپ کو سوشل میڈیا پر اسٹوریز فارمیٹ پسند ہے تو اچھی بات یہ ہے کہ گوگل نے اسٹوریز کو سرچ کا حصہ بھی بنادیا ہے جن میں اے ایم پی اسٹوریز بھی شامل ہیں۔

فیچرڈ ویڈیوز ایک اور نیا فیچر ہے جس میں صارف جب کسی ویڈیو کو سرچ کرے گا تو گوگل خودکار طور پر اس ویڈیو کے پرانے کلپس کو بھی سامنے لے آئے گا۔

امیجز کو سرچ کرنے کے طریقہ کار میں بھی اپ دیٹ کی گئی ہے اور اب ایک نیا رینکنگ الگورتھم متعلقہ تصاویر کی تلاش میں مدد دے گا اور گوگل امیج رزلٹس میں گوگل لینس کا اضافہ بھی کررہا ہے۔

ہنگامی حالات کے شکار افراد کے لیے بھی گوگل نے نئے ٹولز متعارف کرائے ہیں، جن میں اے آئی پر مبنی سیلاب کی پیشگوئی کرنے والا ماڈل، جو سیلاب کے بروقت الرٹ فراہم کرے گا، یہ فیچر فی الحال بھارت میں متعارف کروایا جارہا ہے۔ آخر میں گوگل نے ملازمت کی تلاش کے لیے ایک نیا ٹول پاتھ ویز بھی پیش کیا ہے۔


شیئر کریں